MACTEL.COM.AU
 
 
 
 

Home Page » Top Stories » ИЗГЛАСАН ЗАКОНОТ ЗА УПОТРЕБА НА ЈАЗИЦИТЕ, НЕИЗВЕСНО ДАЛИ ИВАНОВ ЌЕ ГО ПОТПИШЕ
 
ИЗГЛАСАН ЗАКОНОТ ЗА УПОТРЕБА НА ЈАЗИЦИТЕ, НЕИЗВЕСНО ДАЛИ ИВАНОВ ЌЕ ГО ПОТПИШЕ
11.01.2018, 16:29:00
 
 
 

Во Собранието со мнозинство гласови е изгласан Законот за употреба на јазиците. Од опозициската ВМРО-ДПМНЕ го бојкотираа гласањето, но го осудија законот. Неизвесно дали претседателот Иванов ќе го потпише законот.

.

Новото законско решение во парламентот го поддржаа сите 69 присутни пратеници. Пратениците на ВМРО-ДПМНЕ не учествуваа во гласањето поради бојкотот на Собранието. Законот го аминуваа и пратениците од помалите етнички заедници.

Со законот се предвидува во сите органи на државната власт, како централни институции, јавни претпријатија, агенции, дирекции, установи и организации, комисии и правни лица што вршат јавни овластувања, службен јазик освен македонскиот јазик и неговото писмо, да биде и албанскиот јазик. Новото решение ќе се применува во комуникацијата, употребата и во сите постапки на граѓаните пред сите органи што ја сочинуваат државната власт, Уставниот суд, народниот правобранител, во изборниот процес, образованието, науката, здравството, културата, при примената на полициските овластувања, радиодифузната дејност, нотаријатот, извршувањето, инфраструктурните објекти, матичната евиденција, личните документи, финансиите, економијата, како и во други области.

Стенограмите, материјалите и документите од седниците на Собранието, Владата и работните тела исто така ќе се издаваат и чуваат на македонски и на албански јазик. Истото важи и за интернет-страниците на институциите кои освен на македонски треба да бидат и на албански јазик. Албанскиот јазик ќе влезе во службена употреба и во називите на институциите и нивните подрачни единици во единиците на локалната самоуправа, во кои најмалку 20 отсто од граѓаните зборуваат службен јазик поинаков од македонскиот, како и во Скопје.

Книжните и кованите пари, како и поштенските марки, ќе содржат симболи што го претставуваат културното наследство на граѓаните што го зборуваат македонскиот јазик и неговото кирилско писмо и на албански јазик. Истото важи и за поштенските марки, уплатниците, фискалните извештаи издадени од институциите, фактурите, бандеролите. Униформите на полицијата, пожарникарството и здравството во Скопје и во општините каде што живеат 20 отсто Албанци исто така ќе бидат двојазични. Албанскиот јазик ќе се применува и во сите судски, управни, нотарски и извршни постапки. Граѓаните што го користат албанскиот јазик во иднина ќе ги добиваат личните карти и пасошите на тој јазик.

Во првичната реакција по донесувањето на законот, од ВМРО-ДПМНЕ оценија дека истиот е неуставен и дека не придонесува за реално унапредување на правата на албанската заедница во Македонија. Неизвесно е дали шефот на државата Ѓорге Иванов ќе го потпише законот. Доколку не го стори тоа, пратеникот на ДУИ Артан Груби најавува дека законот повторно ќе се изгласа во Собранието. Груби вели дека со изгласувањето на законот „по 15 години се заокружил Охридскиот рамковен договор“.

Владата претходно најави дека законот ќе оди на проверка во Венецијанската комисија, и доколку во него се утврдат неуставни елементи, ќе оди на доработка, пренесе Дојче Веле.

Откако денеска со 69 гласа „за“ беше изгласан Предлог законот за употреба на јазиците, надвор пред Собранието се собраа група граѓани на протести.

Тие, како што велат се револтирани од донесувањето на законот, кој ја прави двојазична Македонија. Со нив носат огромни знамиња на кои пишува „Македонија“..

 
 
 
 
 
      
 
 
 
Related News