На 24ти Септември, во прекрасниот амбиент на Емпориум Рецептион во Bankstown се прослави четвртата по ред матурска вечер во присуство на околу 220 гости меѓу кои: наставниците, родителите и ред официјални гости им беа врачени допломати на 31 матурант за успешно завршено изучување на македонскиот јазик.
Учениците беа поздравени од директорката на Саботните центри за јазици Аделиа Фулер, Амбасадорот на Република Македонија господинот Перо Стојановски, Координаторката за јазици при Средношколскиот училишен центар за јазици во Bankstown Билјана Божиноска, со желби за понатамошни успеси во нивните матурски испити и нивните идни планови.
Меѓу присутните беше и претседателката на Учителската Асоцијација од Melbourne Госпоѓата Љубица Талеска и официјални гости од Македонија меѓу кои и градоначалникот на општина Аеродром господинот Ивица Коневски, кој исто така ги поздрави матурантите. Исто така како изненадување за учениците и сите присутни беше најавена наградата која ја додели Училишниот Одбор при Нов Јужен Велс: Авионска карта за Македонија за оној ученик кој ќе освои највисоки проценти во Македонскиот јазик во претстојните Матурски испити. Оваа награда со пригоден говор ја најави Претседателката на Училишниот Одбор при Нов Јужен Велс Жаклина Михајлова при што им пожели успех во испитите на сите ученици со порака што повеќе Македончиња да го изучуваат мајчиниот јазик.
Пригоден говор одржа Македонскиот амбасадор за Австралија господинот Перо Стојановски кој меѓу другото рече: Културата на еден народ се одржува преку јазикот, и тој е единственото нешто преку кој можеме да ги пренесеме и задржиме нашата историја, култура и нашиот идентитет овде во Австралија. Вие носите две култури и тоа е големо богатство, вие имате големи вредности и притоа им помагате на луѓето околку вас овде во Австралија да дознаат која е Македонија.
На почетокот од забавниот дел на вечерта настапи КУД Илинден, чии момчиња и девојки го разубавија амбиентот цо убавите народни носии беспрекорно усовршените ора и сплетови со кои ја воодушевија публиката. Искрена благодарност беше упатена до играорците и претседателката на КУД ИлинденСлавица Јосифовска.
Новата генерација Македонски матуранти со гордост го истакнаа своите добиени дипломи, искажаа искрена благодарност кон своите наставници и најавија дека ова е почеток на нивните нови походи кон повисоките образовни институции ширум Австралија.
Благодарност беше упатена до сите наставници кои неуморно работеа и придонесоа оваа вечер да биде успешна.
Оваа вечер беше доказ за уште една нова успешна генерација на Македонски матуранти, и уште еднаш им пожелуваме многу успеси!!! Среќно!!!
Матуранти 2010 |
